I quajti protestat pro Palestinës në Britani “marshime urrejtjeje”, shkarkohet ministrja e brendshme

Sekretarja e Brendshme e Britanisë së Madhe, Suella Braverman është shkarkuar pas ndryshimit në kabinetin e kryeministrit, transmeton Anadolu.

Sekretarja e Brendshme Braverman u shkarkua nga kryeministri Rishi Sunak në një riorganizim të kabinetit, raportoi BBC.

Sekretari i Jashtëm James Cleverly zëvendësoi Braverman si sekretar të brendshëm.

“Ka qenë privilegji më i madh i jetës sime të shërbeja si sekretare e brendshme”, tha Braverman pas shkarkimit. “Do të kem më shumë për të thënë në kohën e duhur”, shtoi Braverman, sipas raportit.

Ndërkohë, kryeministri i Skocisë Humza Yousaf, i cili kishte kërkuar më herët dorëheqjen e saj, tha: “Tani duhet të ketë zgjedhje të përgjithshme”.

“Asnjëherë nuk ka qenë dikush kaq i papërshtatshëm në poste publike sa Suella Braverman. Konservatorët janë pa ide dhe pa kohë, tani duhet të ketë zgjedhje të përgjithshme”, shkroi ai në X.

Shkarkimi i Braverman erdhi pas reagimeve rreth komenteve të saj të diskutueshme për protestat pro-palestineze dhe artikullin e saj në gazetën “The Times” që shkaktoi kritika masive.

Braverman shkaktoi zemërim të gjerë pasi i quajti protestat pro Palestinës në Britani “marshime urrejtjeje”. Më vonë, ajo shkroi një artikull në “The Times”, duke pohuar: “Unë nuk besoj se këto marshime janë thjesht thirrje për ndihmë për Gazën”.

Ajo akuzoi Policinë Metropolitane se “tregoi favorizim” me protestuesit, pasi forcat policore të Londrës vendosën të mos kërkojnë ndalimin e marshimit të planifikuar në Ditën e Armëpushimit.

“Ato janë një pohim i përparësisë nga grupe të caktuara, veçanërisht islamikët, të llojit që jemi mësuar më shumë të shohim në Irlandën e Veriut”, shkroi ajo.

Më vonë, Downing Street konfirmoi se Braverman nuk bëri modifikimet e kërkuara në artikullin e saj.

Ajo u akuzua për inkurajimin e grupeve të së djathtës ekstreme që u përleshën me policinë të shtunën gjatë ceremonisë së Ditës së Armëpushimit. Thuhet se Sunak iu kërkua të shkarkonte Braverman, ndërsa Paul Scully, ministri për Londrën, tha se sekretarja e brendshme po nxit “urrejtje dhe ndarje” me komentet e saj.

Përveç kësaj, vendi pret vendimin e Gjykatës së Lartë të Mbretërisë së Bashkuar rreth ligjshmërisë së planit të Braverman për të dërguar azilkërkuesit në Ruandë.

Plani i Ruandës u shpall i paligjshëm nga Gjykata e Apelit në fillim të këtij viti, megjithëse qeveria po e kundërshton vendimin.

Mbretëria e Bashkuar i pagoi Ruandës 120 milionë euro paraprakisht për të lehtësuar zbatimin e marrëveshjes pesëvjeçare, për të cilën qeveria britanike shpreson se mund të ndihmojë në pengimin e migrantëve që të ndërmarrin udhëtimin e rrezikshëm përmes Kanalit Anglez me varka të vogla.

Më shumë se 44 mijë emigrantë mbërritën në Mbretërinë e Bashkuar përmes Kanalit Anglez vitin e kaluar.

Braverman, deputete e Partisë Konservatore nga Fareham, ishte në detyrë nga shtatori 2022.