Gashi për interpelancën: Është reflektim i demokracisë, deputetët të votojnë sipas bindjes së tyre

Jam i lumtur që kam mundësinë të flas për interpelancën për të shpjeguar disa gjëra që janë shprehur në publik, tha kryetari i Kuvendit, Afrim Gashi në një intervistë për TV Sitel në prag të interpelancës së nesërme. Sipas tij, ky është reflektim i demokracisë dhe proceseve demokratike në një vend.

– Është mirë të kesh mendime të ndryshme, ky është thelbi i demokracisë. Do të ishte keq sikur të kishte një mendim të vetëm, dhe ne e kemi kaluar atë sistem. Jam shumë i lumtur që nesër do të kem rastin t’i përgjigjem publikut për gjithçka që u prek dhe u interesua, tha ai.

Gashi thekson se ndërgjegjja e tij është e qetë dhe e pastër dhe nuk ka kontribuar asgjë për të shkaktuar ndonjë problem.

– E kam ndërgjegjen e qetë dhe të pastër që nuk kam shkaktuar me asgjë histeri në publik. Vetë interpelanca nuk i referohet diçkaje që është shkelur rrënjësisht në Kuvend, apo që i është shkurtuar e drejta një deputeti apo një grupi deputetësh, por bëhet fjalë për tema të parëndësishme që fitojnë popullaritet në rrjetet sociale. Por unë jam gati të flas edhe për këtë. Unë e bëj punën time në mënyrën më dinjitoze. Në mënyrën më të ndërgjegjshme dhe më të përgjegjshme.  Nesër deputetët do ta shprehin mendimin e tyre dhe jam i gatshëm të respektoj çdo përgjigje dhe çdo vendim të Kuvendit tonë, tha Gashi.

Ai u bëri thirrje të gjithë deputetëve të opozitës dhe partisë së tij që nesër të votojnë individualisht sipas bindjes së tyre personale.

– Unë këtë interpelancë nuk e shoh nga pikëpamja politike, por nga një këndvështrim individual i çdo deputeti. Dhe do të ftoja çdo deputet që të votojë sipas bindjes së tij personale. I kërkoj edhe deputetëve të koalicionit tim VLEN të votojnë në këtë mënyrë. Ne duhet të mësojmë se si t’i përgjigjemi publikut. Interpelanca është një mjet shumë demokratik që na lejon të jemi të përgjegjshëm si para deputetëve, ashtu edhe ndaj qytetarëve dhe duhet të mësojmë prej tij. Dhe nesër do të dal me përgjigjen time para publikut dhe deputetëve dhe besoj se secili do të votojë sipas bindjes së tij dhe sipas ndërgjegjes së tij të pastër. Për këtë interpelancë, falënderoj edhe Të Majtën për mundësinë e dhënë për të paraqitur argumentet e mia, pas të cilave qëndroj edhe sot, shtoi kryeparlamentari Gashi.