Erdoğan: Për plot 28 ditë në Gaza janë kryer krime kundër njerëzimit

Presidenti turk, Recep Tayyip Erdoğan, ka deklaruar se bota e unifikuar turke duke vepruar së bashku do të ndihmojë në hapjen e rrugës për një armëpushim dhe paqe të përhershme në konfliktin Izrael-Palestinë, raporton Anadolu.

“Nuk ka asgjë që mund të justifikojë atë që ne kemi parë që nga 7 tetori,” tha Erdoğan, duke iu referuar sulmeve të pamëshirshme të Izraelit në Gaza, në një fjalim në samitin e Organizatës së Shteteve Turke në Astana, kryeqyteti i Kazakistanit.

“Nuk ka fjalë për të përshkruar këtë brutalitet. Për plot 28 ditë në Gaza janë kryer krime kundër njerëzimit”, theksoi ai.

Në lidhje me ndihmën e Türkiyes për palestinezët e prekur nga sulmet izraelite, Erdoğan tha se deri më tani ka dërguar 10 aeroplanë me ndihma humanitare në Gaza dhe do të dërgojë edhe më shumë sipas rrethanave.

“Përpjekjet tona për organizimin e një konference ndërkombëtare paqeje janë në vazhdim”, shtoi ai, duke iu referuar nismës turke për t’i dhënë fund konfliktit.

Këtë javë ushtria izraelite ka zgjeruar sulmet e saj ajrore dhe tokësore në Gaza, e cila ka qenë nën sulme të pamëshirshme ajrore që kur grupi palestinez Hamas filloi një sulm ndërkufitar më 7 tetor.

Mbi 10.500 njerëz janë vrarë në konflikt, duke përfshirë të paktën 9.061 palestinezë.